En 2021, Renfe levou a cabo a operación de adquisición do 50% do operador Leo Express tras a ampliación de capital social da compañía checa.
A entrada no capital de Leo Express constitúe unha oportunidade estratéxica para Renfe, xa que lle permite ter presenza en tres países europeos (República Checa, Eslovaquia e Polonia) onde Leo Express opera, e dispor dos recursos e licenzas para acceder ao mercado alemán.
Así mesmo, esta adquisición permite a Renfe optar, a través de Leo Express, a novas licitacións de OSP nos mercados mencionados, xa que conta con capacidade de implantación local, experiencia, equipo, ou referencias nestes países, moitas veces imprescindibles para poder concursar.
Leo Express é unha compañía privada que comezou a operar en 2012 en República Checa e, desde entón, foi expandindo os seus servizos de acceso aberto a través da extensión destes a países veciños como Eslovaquia e Polonia. Tamén conta con experiencia en Alemaña onde, ata o inicio da pandemia, estivo operando un servizo de acceso aberto de longa distancia entre Berlín e Stuttgart, en cooperación con outro operador privado.
Unha das áreas de negocio onde Leo Express busca crecer é o mercado de servizos de Obrigas de Servizo Público (OSP). Neste ámbito, a compañía é titular de contratos OSP na propia República Checa. Ademais, trala entrada de Renfe no capital, Leo Express resultou adxudicatario dun contrato OSP en Eslovaquia de 9 anos, na rexión do Danubio, para operar a liña que une Bratislava e Komárno, que supuxo que o volume produtivo e de negocio da compañía se duplicase practicamente.